- 357 -

1393. Sept. 17. Liegnitz.

Herzog Ruprecht giebt für sich und seine Brüder der Stadt ein Privileg über den Verkauf von 17 Mark Erbgeschoss.

Wir Ruprecht von gots gnaden herczog yn Slezien vnd herre czu Legnicz bekennen vffinlich mit dezem briue, daz wir von vnsir selbis wegen vnd von der hochgebornen fursten, herczogen Wenczlaws, Bonczlaws vnd Heynrichs vnser lieben brudere wegin, diede von gotlichin gnaden auch mit vns erbherren syn zu Legnicz, der vormunde wir iczund syn, vnsirn schaden zuvormyden vnd vnsirn fromen zuwerbin, mit rathe vnsir getrouwin ernstlich befolin vnd gebotin han, vnsern getrouwen lieben burgemeister vnd rathmannen, den geswornen allir handwerke, den eldsten vnd der ganczen gemeynde vnser stath Legnicz, die iczund syn vnd noch en komen vnd gekorin werdin, daz si sullen vorkoufin vnd auch vorkouft habin sebenczehn mark vnsirs rechtin erbgeschozsis, daz izund Hanken Enkelgers von Brezslaw tochter vff derselbin vnsir stath Legnicz hat zu irem lybe, Petirn Heseler burger zu Legnicz vnd synen erben noch derselbin Engelgers tochter tode zu habin ye die mark geschozsis vmbe czwelf mark grosschen, vnd dasselbe gelt habin sie ganz vnd gar vor vns beczalit den, an die wir sie habin gewysit, vnd globin en, daz wir ire brife, gelobde vnd vorbindnucze, die sie tuen vnd von dezselbin geschozsis wegin gebin stete vnd gancz mit en wellin baldin, also doch vornemlich, daz wir vns vnd vnsirn nochkomlingen erbherren zu Legnicz vngehindirten wedirkouff vnd losunge behaldin dez obgenanten geschozsis ye die mark vor czwelfe. Dez zu sicherheit vnd bestetegunge haben wir en desin brieff vorsegilt mit vnsirn gemeynen ingesegel zu Legnicz, noch . . Crists geburde vnsers liebin herren tousund vnd dryhundirt jare ynm dryvndnewnczegstin jare an sente Lamprechtstage.

O. d. Sl. L. No. 179. Das Siegel an Pergamentstreifen. — Altes Privilegb. p. 15. — Bitschens Privilegb. f. CXXXIVb.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866